ಧ್ವನಿ ಟ್ರಸ್ಟ್ ಸ್ಥಾಪನೆಯ ಹಿನ್ನೆಲೆ
 

1990ರ ಕಾಲ. ಶಾಲೆ-ಕಾಲೇಜುಗಳು, ಸಂಶೋಧನ ಕೇಂದ್ರಗಳಲ್ಲಿ ಶಿಕ್ಷಕರಾಗಿ, ಉಪನ್ಯಾಸಕರಾಗಿ, ಸಂಪನ್ಮೂಲ ವ್ಯಕ್ತಿಗಳಾಗಿ ಅನುಭವ ಹೊಂದಿದ್ದ ಸಮಾನ ಮನಸ್ಕ ಗೆಳಯರ ಗುಂಪು ಒಂದಿತ್ತು. ಗ್ರಾಮೀಣ ಮತ್ತುನಗರ ಪ್ರದೇಶಗಳಲ್ಲಿ ಬದುಕಿ, ಕಲಿತು, ಅಧ್ಯಯನ ಮಾಡಿ ಬೆಳೆದ  ಜೀವನದ ಬೇರೆ ಬೇರೆ ಹಂತದ ಅನುಭವದ ಹಿನ್ನೆಲೆ ಆ ಗುಂಪಿನ ಸದಸ್ಯರಿಗೆ  ಇದ್ದಿತು. ಇಂಥ ಗೆಳೆಯರ ಗುಂಪು, ಆಗಿನ ಬೆಂಗಳೂರಿನ ಪ್ರಶಾಂತ ಹೊರವಲಯದಲ್ಲಿ ಕುಳಿತು, ಹೆಚ್ಚೂಕಡಿಮೆ ದಿನವೂ ಸಂಜೆ  ಶಿಕ್ಷಣ ಮತ್ತು ಜೀವನ ಮೌಲ್ಯಗಳಿಗೆ ಸಂಬಂಧಿಸಿದ ಅನೇಕ ಪ್ರಶ್ನೆಗಳನ್ನು ಕುರಿತು ಗಂಭೀರವಾಗಿ ಸಂವಾದ ನಡೆಸುತ್ತಿತ್ತು. ಹಲವು ತಿಂಗಳುಗಳ ಕಾಲ ನಡೆದ ಆ ಅನ್ವೇಷಣಾತ್ಮಕ  ಸಂವಾದದಲ್ಲಿ ಅನೇಕ ಒಳನೋಟಗಳು, ಹೊಸ ಹೊಳಹುಗಳು ಹುಟ್ಟಿಕೊಳ್ಳುತ್ತಿದ್ದವು. ಆ ಒಳನೋಟಗಳು ಮತ್ತು ಹೊಸ ಹೊಳಹುಗಳಿಗೆ ಶಿಕ್ಷಣ ಕ್ಷೇತ್ರದಲ್ಲಿ ಏನನ್ನಾದರೂ ಅರ್ಥಪೂರ್ಣವಾದುದನ್ನು ಸಾಧಿಸಬಲ್ಲ ಚೈತನ ಇದ್ದಿತು. 

​
ಆ ಚೈತನ್ಯವು, 2001ರ ಡಿಸೆಂಬರ್ 13ರಂದು ಕಾನೂನುಬದ್ಧವಾಗಿ (ಭಾರತೀಯ ಸೊಸೈಟಿ ಕಾಯ್ದೆ 1860) ಧ್ವನಿ ಟ್ರಸ್ಟ್ ಹೆಸರಿನಲ್ಲಿ ಸ್ಥಾಪಿತವಾಯಿತು(ನೋಂದಣಿ ಸಂಖ್ಯೆ: 210/2001-02). 

​
ಧ್ವನಿ ಟ್ರಸ್ಟ್ ಸ್ಥಾಪನೆಯಾದ ದಿನದಿಂದಲೂ ಟ್ರಸ್ಟಿನ ಶಿಕ್ಷಣ ವಿಭಾಗವಾಗಿ ಧ್ವನಿ ಶೈಕ್ಷಣಿಕ ಸಂಪನ್ಮೂಲ ಕೇಂದ್ರವು ಕಾರ್ಯ ನಿರ್ವಹಿಸುತ್ತಾ ಬರುತ್ತಿದೆ.  
 

 

ಧ್ವನಿ ಟ್ರಸ್ಟ ಒಪ್ಪಿಕೊಂಡಿರುವ ಕೆಲವು ಚಿಂತನೆಗಳು, ಹೊಳಹುಗಳು ಮತ್ತು ಮೌಲ್ಯಗಳು  

 

​ಮನುಷ್ಯ ಜೀವನದಲ್ಲಿ ಶಿಕ್ಷಣದ ಪಾತ್ರ ಅತ್ಯಂತ ಗಹನವಾದುದು. ಆದರೆ, ನಿಜವಾದ ಶಿಕ್ಷಣವು ಓದು-ಬರಹ-ಕೂಡುವ-ಕಳೆಯುವ-ಗುಣಿಸುವ-ಭಾಗಿಸುವಂಥ ಕೌಶಲಗಳ ಗಳಿಕೆಗೆ ಸೀಮಿತವಾಗಿರುವುದಿಲ್ಲ. ನಿಜವಾದ ಶಿಕ್ಷಣವು, ಈ ಪ್ರಾಥಮಿಕ ಕೌಶಲಗಳನ್ನು ಕಲಿಯಬೇಕಾದ ಅಗತ್ಯವನ್ನು ಒಪ್ಪಿಕೊಂಡೂ, ಅವುಗಳ ಸೀಮಾರೇಖೆಯನ್ನು ದಾಟುವ ಮೂಲಕವೇ ಜೀವನದ ಸತ್ಯಗಳನ್ನು- ಸೌಂದರ್ಯಗಳನ್ನು ಕಂಡುಕೊಳ್ಳುವ ಚೈತನ್ಯವನ್ನು ಮನುಷ್ಯನಿಗೆ ತಂದುಕೊಡುವ ಅತ್ಯಂತ ಪ್ರಬಲ ಶಕ್ತಿಯಾಗಿದೆ.

​

ಆದರೆ, ಪ್ರಸಕ್ತ ಶಿಕ್ಷಣವು ಈ ಕೌಶಲಗಳ ಗಳಿಕೆಗೆ, ಅದೂ ತೆಳುವಾದ ರೀತಿಯಲ್ಲಿನ ಗಳಿಕೆಗೆ ತನ್ನೆಲ್ಲ ಶಕ್ತಿಯನ್ನು ವ್ಯಯ ಮಾಡುತ್ತಿದೆ. ಆ  ಕೌಶಲಗಳನ್ನು ಏಕೆ ಗಳಿಸಿಕೊಳ್ಳಬೇಕು ಎಂಬ ಪ್ರಶ್ನೆಗೆ ಅದು ಕೊಡುವ ಉತ್ತರವೂ ಅತ್ಯಂತ ತೆಳುವಾಗಿದೆ. ಇಂಥ ಪರಿಸ್ಥಿತಿಯಲ್ಲಿ, ಪ್ರಜ್ಞಾವಂತನಾದ ವ್ಯಕ್ತಿ, ವ್ಯಕ್ತಿಗಳ ಗುಂಪು ಅಥವಾ ಸಂಸ್ಥೆಯು ಬಯಸುವಂತೆ, ಧ್ವನಿ ಟ್ರಸ್ಟ್ ಕೂಡ ಕೌಶಲಗಳ ಗಳಿಕೆಯನ್ನು ಗೌರವಿಸುತ್ತಲೇ, ಅವುಗಳ ಸಹಾಯದಿಂದ ಜೀವನ ಸತ್ಯ-ಸೌಂದರ್ಯಗಳನ್ನು ಕಂಡುಕೊಳ್ಳುವ, ಬದುಕುವ ಉದಾರ ಹೃದಯದ ಧೀರ ವಿಶ್ವಮಾನವ ನಿರ್ಮಾಣದ ಪ್ರಯತ್ನದಲ್ಲಿ ವಿನಯಪೂರ್ವಕವಾಗಿ ತೊಡಗಿಕೊಂಡಿದೆ.

​

ಮಕ್ಕಳ ಕಲಿಕೆಯು ಕಲಿಕೆಯು ಅತ್ಯಂತ ಸಹಜವೂ ಸುಂದರವೂ ಸಶಕ್ತವೂ ಅರ್ಥಪೂರ್ಣವೂ ಆಗುವಂತೆ ಮಾಡಲು  ಮನೆಯ ಮಾತು-ತಾಯಿನುಡಿ, ಅದರ ಹತ್ತಿರದ ಪರಿಸರದ ಭಾಷೆಗಳು ಆದ್ಯತೆ ನೀಡುವುದು. ಸುತ್ತಮುತ್ತಲಿನ ಸಾಮಾಜಿಕ – ಪ್ರಾಕೃತಿಕ- ಸಾಂಸ್ಕೃತಿಕ ಅಂಶಗಳಿಗೆ ಆದ್ಯತೆ ನೀಡುವುದು.   

​

ಜೀವನದ ಬಹು ಬೆಲೆಯುಳ್ಳ ಮೌಲ್ಯಗಳಾಗಿರುವ ಸಹಕಾರ, ಸಹಬಾಳ್ವೆ, ಸಂತಸ, ಆನಂದಗಳನ್ನು ಶಿಕ್ಷಣದ  ಮೂಲಕ ಸಾಧ್ಯವಾಗಿಸಲು ಪ್ರಯತ್ನಿಸುವುದು.   

​

ಮಗುವಿನ  ಸಮಗ್ರ ವ್ಯಕ್ತಿತ್ವದ ಬೆಳವಣಿಗೆಯಲ್ಲಿ ಇಡೀ ವಿಶ್ವ ಚೇತನ್ಯ ಮತ್ತು ವಿಶ್ವ  ಸಂಸ್ಕೃತಿಯು ಸಹಜವಾಗಿ ಒಳಗೊಳ್ಳುತ್ತಾ ವಿಶ್ವಮಾನವನಾಗುವ ದಿವ್ಯ ವಿದ್ಯಮಾನಕ್ಕೆ  ಮುಕ್ತವಾಗುವ ವಾತಾವರಣ ಸೃಷ್ಟಿಸುವುದು. 

​

​​

ಮೇಲಿನ ಹೊಳಹು ಚಿಂತನೆಗಳನ್ನು ಸಾಕಾರಗೊಳಿಸಲು ಕಂಡುಕೊಂಡಿರುವ ದಾರಿ

​

ಸಮಗ್ರ ಶಿಕ್ಷಣಕ್ಕೆ ಅತ್ಯಂತ ಗಟ್ಟಿಯಾದ ಬುನಾದಿಯ ಅಗತ್ಯವಿದೆ. ಆ ಬುನಾದಿಯೇ ಪ್ರಾಥಮಿಕ ಹಾಗೂ ಪ್ರೌಢಶಾಲಾ ಶಿಕ್ಷಣ. ಧ್ವನಿ ಟ್ರಸ್ಟ್  ತನ್ನ ಅಂಗವಾಗಿರುವ ಧ್ವನಿ ಶೈಕ್ಷಣಿಕ ಸಂಪನ್ಮೂಲ ಕೇಂದ್ರದ ಮೂಲಕ ಈ ಕೆಲಸಗಳಲ್ಲಿ ತೊಡಗಿಕೊಂಡಿದೆ.

​* ಶೈಕ್ಷಣಿಕ ಯೋಜನೆಗಳನ್ನು ರೂಪಿಸುವುದು

 

​* ಮಕ್ಕಳ ಕಲಿಕೆ ಹಾಗೂ ಶಿಕ್ಷಕರ ಬೋಧನೆಗೆ ಪೂರಕವಾಗುವ ಸಂಪನ್ಮೂಲಗಳನ್ನು ರೂಪಿಸುವುದುಂಟು

 

​* ವಿಶಿಷ್ಠ ಹಾಗೂ ವಿಭಿನ್ನ ರೀತಿಯ ಕಾರ್ಯಾಗಾರಗಳ ಮೂಲಕ ಶಿಕ್ಷಕರ ಚಿಂತನಾ ಕ್ರಮ, ಬೋಧನಾ     

  ವಿಧಾನಗಳಲ್ಲಿ  ಹೊಸತನ ಮೂಡಿಸಲು  ಯತ್ನಿಸುವುದು

 

​* ಮಕ್ಕಳು ಮತ್ತು ಶಿಕ್ಷಕರಲ್ಲಿ ಸಾಹಿತ್ಯಾಭಿರುಚಿ ಮೂಡಿಸುವುದು

 

​* ಜೀವನ ಮೌಲ್ಯಗಳ ಬಗ್ಗೆ ಕಾಳಜಿಯುಳ್ಳವರಿಗಾಗಿ ಸಂವಾದ ಏರ್ಪಡಿಸುವುದು

 

​* ಮುಖ್ಯವಾಗಿ ಶಿಕ್ಷಣ ಕ್ಷೇತ್ರದಲ್ಲಿ ನಡೆದಿರುವ ಸಂಶೋಧನೆಗಳ ಅಧ್ಯಯನ ಮತ್ತು ಅನುವಾದ ಹಾಗೂ ವಿವಿಧ  

   ಮಾಧ್ಯಮಗಳಲ್ಲಿ ಪ್ರಕಟಣೆ ಮಾಡುವುದು  

​

 

ಕಾರ್ಯಕ್ರಮಗಳು

 

• ಪಠ್ಯಪುಸ್ತಗಳನ್ನು ಅವುಗಳ ಎಲ್ಲ ಮಿತಿಗಳೊಂದಿಗೆ ಒಪ್ಪಿಕೊಂಡೂ, ಅವುಗಳಿಗೆ ಸೀಮಿತಗೊಳ್ಳದೇ ಪಠ್ಯಕ್ರಮದ ಆಶಯ ಆಧಾರಿತ ಪೂರಕ ಸಂಪನ್ಮೂಲಗಳ ಸೃಷ್ಟಿ, ಪ್ರಕಟಣೆ ಮತ್ತು ವಿತರಣೆ ಮಾಡುವುದು.

 

• ಸೇವಾನಿರತ ಹಾಗೂ ಸೇವಾಪೂರ್ವ ಶಿಕ್ಷಕರಿಗಾಗಿ ತರಬೇತಿ ಕಾರ್ಯಾಗಾರಗಳನ್ನು ಆಯೋಜಿಸುವುದು.

 

• ಶಿಕ್ಷಣ ಕ್ಷೇತ್ರದಲ್ಲಿ ನಡೆಯುತ್ತಿರುವ ನವೀನ ಪ್ರಯೋಗಗಳು, ಸಂಶೋಧನೆಗಳನ್ನು ಮೂಲ ಲೇಖನಗಳ ಬರವಣಿಗೆ ಮತ್ತು ಅನುವಾದಗಳ ಮೂಲಕ ಪರಿಚಯಿಸುವುದು.

 

• ಸಮಾನ ಮನಸ್ಕ ವ್ಯಕ್ತಿಗಳು ಮತ್ತು ಸಂಸ್ಥೆಗಳೊಂದಿಗೆ ಸಹಕಾರ್ಯಗಳಲ್ಲಿ ತೊಡಗಿಕೊಳ್ಳುವುದು.

 

 

ಮೇಲಿನ ಮೂರು ಕಾರ್ಯಕ್ರಮಗಳನ್ನು ಧ್ವನಿ ಸಂಪನ್ಮೂಲ ಕೇಂದ್ರವು ಆರಂಭ, ಪೂರಣ, ಚಿತ್ರಣ ಇವೇ ಮುಂತಾದ ಯೋಜನೆಗಳ ಮೂಲಕ ಅನುಷ್ಠಾನಕ್ಕೆ ತರುತ್ತಿದೆ. ಈ ಯೋಜನೆಗಳ ಮೂಲಕ ಸೃಷ್ಟಿಯಾಗುವ ಪಠ್ಯಕ್ರಮ ಪೂರಕ ಸಂಪನ್ಮೂಲಗಳನ್ನು ಆಯಾ ಯೋಜನೆಗಳಲ್ಲಿ ಭಾಗವಹಿಸುತ್ತಿರುವ ಶಿಕ್ಷಕರು, ಮಕ್ಕಳು, ಪಾಲಕರು ಮುಂತಾದವರೊಂದಿಗೆ ಉಚಿತವಾಗಿ ಹಂಚಿಕೊಳ್ಳಲಾಗುತ್ತಿದೆ.

 

ಬಹುಪಾಲು ಸಂಪನ್ಮೂಲಗಳು ಮುದ್ರಿತ, ಮೂರು ಆಯಾಮ ಜೊತೆಗೆ ವಿವಿಧ ಬಗೆಯ ಡಿಜಿಟಲ್ ರೂಪಗಳಲ್ಲಿ ಸಿದ್ಧಗೊಳ್ಳುತ್ತವೆ. ಮುದ್ರಿತ ಹಾಗೂ ಕೇಳುವ-ನೋಡುವ ಸಂಪನ್ಮೂಲಗಳನ್ನು ಆಸಕ್ತರು ಈ ಬೆಬ್ ಸೈಟ್ ಮೂಲಕವೂ ಪಡೆದುಕೊಳ್ಳಬಹುದು.